Ministria e Jashtme dënon sulmin ndaj Ambasadës Bullgare në Shkup

Më 11 janar, një person i panjohur kreu një sulm ndaj Ambasadës Bullgare në Shkup. Ministria e Punëve të Jashtme dënon fuqimisht këtë akt kundër ndërtesës së përfaqësisë bullgare në Shkup - një simbol i shtetësisë dhe pranisë zyrtare të Bullgarisë në Maqedoninë e Veriut.

Ky është një sulm i papranueshëm ndaj statusit të misionit diplomatik dhe një shkelje e rëndë e Konventës së Vjenës për Marrëdhëniet Diplomatike. Ministria e Punëve të Jashtme shpreh shqetësimin e saj të thellë se një akt kaq i guximshëm është rezultat i mungesës sistematike të reagimit nga institucionet kompetente në Shkup ndaj sulmeve dhe akteve të mëparshme të vandalizmit kundër objekteve që lidhen me Bullgarinë dhe komunitetin bullgar.

Ky pasivitet institucional, i kombinuar me gjuhën e urrejtjes të toleruar dhe madje të nxitur kundër Bullgarisë dhe bullgarëve në fqinjin tonë, ka krijuar një mjedis në të cilin akte të tilla kriminale inkurajohen dhe përshkallëzohen, bëri të ditur Ministria në një deklaratë, duke u kërkuar autoriteteve në Maqedoninë e Veriut që të ndërmarrin menjëherë të gjitha veprimet e nevojshme për të identifikuar autorin dhe për ta sjellë atë para drejtësisë, si dhe për të garantuar sigurinë e misioneve diplomatike dhe konsullore bullgare, stafit të tyre dhe pronës së tyre. Ambasadori bullgar në Shkup, Zheljazko Radukov, komentoi për BNT se pas inkurajimit të këtij lloji sulmesh nga sundimtarët në Maqedoninë e Veriut, ai është i shqetësuar për anëtarët e komunitetit bullgar në ish-republikën jugosllave, të cilët nuk kanë mbrojtjen diplomatike që gëzojnë diplomatët bullgarë.

 

Redaktoi: Ivo Ivanov

Përgatiti në shqip: Vesella Mançeva